دجاج كنتاكي وارز الريزو وسلطة الكول سلو بالطريقة الاصلية




طريقة عمل دجاج كنتاكي وارز الريزو وسلطة الكول سلو بالطريقة الاصلية 
المقادير /
1- الفراخ /
كيلو دبابيس فراخ او فرخة مقطعة 8
التتبيلة :
علبتين زبادي
ملعقة كبيرة صلصة
2 ملعقة كبيرة مستردة
ملعقة كبيرة خل
ملح
ملعقة كبيرة فلفل اسود
رشة كمون
ملعقة كبيرة بهارات فراخ
ملعقة كبيرة ثوم بودرة
ملعقة كبيرة بصل بودرة
للتغليف /
2 كوب دقيق
ملعقة كبيرة بيكنج باودر
ملح
فلفل اسود 
بابريكا
بهارات فراخ
ثوم بودرة
بصل بودرة
للقلي /
زيت غزير
2 - الارز :
2 كوب ارز مصري
4 قطع استربس فراخ بانية
2 ملعقة كبيرة سكر
بصلة مفرومة خشن
بهارات فراخ
ملح
فلفل اسود
كاري
كركم
مكعب مرقة دجاج
مياة مغلية
للصوص /
2 ملعقة كبيرة كاتشب
2 ملعقة كبيرة باربكيو صوص
1 ملعقة كبيرة مستردة
1 ملعقة كبيرة عسل ابيض
3- سلطة الكول سلو :
كرنب مبشور
جزر مبشور
للصوص /
4 ملاعق كبار مايونيز
ملعقة صغيرة ملح
ملعقة كبيرة عسل ابيض
ملعقة كبيرة خل

الطريقة /
لتحضير الفراخ :
بنسلق الفراخ نصف سلقة يادوب تاخد غلوتين مش اكتر في مياة مغلية مع بصلة وورق لورا وحبهان ورشة فلفل اسود وبعد كدة بنصفيها تماما في مصفاة ونسيبها تبرد 
بعد ما تبرد نعمل فيها فتحات بالسكينة علشان التتبيلة توصل لها كلها كويس
في بولة عميقة نضع الزبادي والصلصة والمستردة والخل والملح والفلفل الاسود والكمون والبهارات والثوم البودرة والبصل البودرة ونقلب الخليط ده جيدا ونضع فيه الفراخ اللي سلقناها ونتبلها جيدا وندخل التتبيلة في الفتحات اللي عملناها ونضع كمان قطع البانية اللي هنعمل بيها ارز الريزو ونسيبهم في التتبيلة ليلة كاملة علشان تتشرب التتبيلة كويس اوي
في بولة هنضع الدقيق والبيكنج باودر والملح والفلفل الاسود والبابريكا والبهارات والثوم البودرة والبصل البودرة ونقلب الخليط جيدا ونقسمه على طبقين
طبق منهم هنسيبه زي ما هو والتاني هنضيف له مياة بسيطة بالتدريج لحد ما يبقى قوامه شبه قوام الكيك
هناخد قطع الفراخ من التتبيلة ونضعها في طبق الدقيق اللي متضاف له المياة ونغلفها تماما بالخلطة ونطلعها منه على طبق الدقيق الجاف ومنه على زيت غزير ساخن وعلى درجة حرارة عالية واول ما الخلطة تمسك عليه نخلي درجة الحرارة متوسطة ونغطي الزيت ونسيب الفراخ 10 دقائق تقريبا وبعد كدة نعلي الحرارة تاني واول ما تقرمش نصفيها ونخرجها من الزيت على مناديل مطبخ علشان تتشرب باقي الزيت وتقدم بالهنا والشفا :)
ونعمل نفس الخطوات مع قطع البانية اللي هنعمل بيها الارز بس نراعي انها مش هتاخد تسوية زي الفراخ لانها مخلية بدون عضم فهنحمرها عادي زي البانية 
لتحضير ارز الريزو /
في حلة مناسبة هنضع السكر على نار هادئة لحد ما يتكرمل ولونه يبقى ذهبي فاتح ونضيف الزيت والبصل وبهارات الفراخ ومرقة الدجاج والكاري والكركم ونقلب واول ما البصل ياخد لون ذهبي فاتح نضيف الارز ونشوحه جيدا ونضيف الملح والفلفل الاسود والمياة المغلية ونسيبه على نار عالية واول ما يتشرب نهدي النار تماما ونتركه حتى تمام النضج
لتحضير صوص الارز :
في اناء مناسب نضع الكاتشب والباربكيو صوص والمستردة والعسل ونقلبهم جيدا ونضعهم على النار ياخدوا غلوة واحدة
بنغرف الارز في طبق التقديم ونضع عليه الفراخ البانية بعد ما نقطعها مكعبات صغيرة بعد ما تتحمر ونرش على الوجه الصوص ويقدم بالهنا والشفا :)
لتحضير سلطة الكول سلو /
نضع المايونيز والملح والعسل والخل في بولة عميقة ونقلبهم جيدا ونضيف لهم الجزر المبشور والكرنب المبشور ونقلب الخليط جيدا ونتركه في الثلاجة ليلة كاملة او 4 ساعات على الاقل قبل التقديم وتقدم بالهنا والشفا :) 





















دجاج كنتاكي, فراخ كنتاكي في البيت, خلطة فراخ كنتاكي الاصلية, فراخ مقلية كنتاكي, رز الريزو بالطريقة الاصلية, ارز الريزو بطريقة كنتاكي, سلطة الكلو سلو, سلطة الكول سلو الاصلية, 

تعليقات