كيكة كل يوم بطريقة الشيف منال العالم من برنامج مطبخ منال العالم





طريقة عمل كيكة كل يوم بطريقة الشيف منال العالم من برنامج مطبخ منال العالم 
المقادير /
3 كوب دقيق "دقيق الضحى نتيجته بتطلع حلوة وفي برضة 5 نجوم تحفة"
2 كوب سكر ابيض ناعم حبيبات "مش بودرة"
1 كوب لبن حليب سائل "مش بودرة"
1 كوب زبدة طرية "ما تنفعش سمنة لازم زبدة صفراء"  
4 بيضات كبار ابيض او احمر "يفضل الاحمر ولو هتستخدمي بلدي يبقى 6 بيضات بس اهم حاجة تبقى بدرجة حرارة الغرفة"
باكو بيكنج باودر او كيك شيف 
ملعقة صغيرة فانيليا سائلة او 2 باكو فانيليا باودر 
رشة ملح "ربع معلقة صغيرة"
ملعقة صغيرة خل "هتضيع اي زفارة للبيض وطعمها مش بيبان نهاااائي ( يمكن الاستغناء عنه ) دي خطوة للناس الموسوسة من ريحة زفارة البيض"

الطريقة /
- بنعاير المقادير كلها بمج الشاي الزجاج اللي موجود في كل بيت  
- بنطلع كل المكونات من الثلاجة قبل ما نبدأ شغل بساعتين على الاقل
- قبل ما نبدأ شغل في الكيك مباشرة بنشغل الفرن على درجة حرارة 180 ونسيبه يسخن لحد ما نخلص 
- بننخل الدقيق اكثر من مرة 3 مرات مثلا وبعد كدة بنقلب معاه البيكنج باودر ورشة الملح ونسيبه على جنب
- بالمضرب الكهربا بنضرب الزبدة الطرية مع السكر لحد ما نحصل على قوام كريمي وللاسف لازم مضرب كهربا انا جربتها في الخلاط ما بتطلعش هشة زي بتاعة المضرب او ممكن في الكيتشن بس لو مفيش غير الخلاط جربوا وان شاء الله تطلع حلوة بس لو هتعملوها في الخلاط ابقوا قلبوا الدقيق يدوي بمضرب سلك في الاخر بلاش تضربوه في الخلاط
- بعد ما بنضرب الزبدة والسكر بنضيف البيض بالتدريج بيضة بيضة نضربها ونضيف اللي بعدها ونضيف الفانيليا والخل ونضرب لحد ما الخليط يمتزج تماما
- بنضيف الدقيق اللي خلطناه بالبيكنج باودر والملح على 3 مرات وكل مرة بنضيف معاه 1/3 كمية اللبن ونضرب بالمضرب لحد ما يندمج نضيف الـ 1/3 الباقي وهكذا لحد ما نخلص الدقيق واللبن ونديهم ضربة اخيرة لمدة دقيقة تقريبا علشان نتأكد ان المكونات اتجانست تماما
بندهن صينية مناسبة بالزيت او الزبدة ونرش عليها دقيق ونعفرها كويس اوي ونصب فيها خليط الكيك وندخلها الفرن على الشبكة اول رف ونسيبها نص ساعة ونفتح نبص عليها هي تقريبا بتاخد من 40 الى 50 دقيقة 
- لو لقيناها احمرت ولسه نية من القلب بتدهني اي غطا حلة مناسب عندك بالزيت وتحطيه على الوش وتسيبيها 10 دقايق هتلاقيها استوت ولو معندكيش غطا ينفع يدخل الفرن ممكن تدهني ورقة فويل زيت وتحطيها 
- لو معندكيش قالب مفتوح ممكن تستخدمي قالب عادي مقاس 26 او 28 
- بعد ما تستوي بتطلعيها وبعد ما تهدا تقلبيها على شبكة وتسيبيها تبرد تماما وتقدميها بالهنا والشفا :)
- لو عاوزاها شيكولاتة استبدلي نصف كوب من الدقيق بنصف كوب كاكاو خام وانخليه مع الدقيق ولو عاوزاها برتقال ضيفي ملعقة كبيرة بشر برتقال واستبدلي نصف كوب من اللبن بنصف كوب عصير برتقال


















كيكة كل يوم, كيكة كل يوم بطريقة الشيف منال العالم, طريقة عمل كيكة كل يوم, مقادير كيكة كل يوم منال العالم, كيكة كل يوم مطبخ منال العالم, كيكة كل يوم برنامج مطبخ منال العالم منال العالم, وصفة كيكة كل يوم منال العالم مطبخ منال العالم, حلقة كيكة كل يوم منال العالم مطبخ منال العالم, 

تعليقات