كيكة الشيكولاتة التقليدية بالطريقة الاصلية واسرار وتكات نجاح اى كيك




طريقة عمل كيكة الشيكولاتة التقليدية بالطريقة الاصلية واسرار وتكات نجاح اى كيك 

المقادير :
3 كوب دقيق
3 ملعقة كبيرة كاكاو خام
2 كوب سكر
1 كوب لبن
1 كوب زيت عباد شمس
4 بيضات
باكو كيك شيف
فانيليا
ملعقة صغيرة خل

الطريقة :
بالمضرب الكهربا او في الكيتشن ماشين بنضرب الزيت مع السكر لحد ما السكر يدوب تماما 
- بعد ما بنضرب الزيت والسكر بنضيف البيض بالتدريج بيضة بيضة نضربها ونضيف اللي بعدها ونضيف الفانيليا والخل ونضرب لحد ما الخليط يمتزج تماما
- بنضيف الدقيق اللي خلطناه بالبيكنج باودر والملح والكاكاو على 3 مرات وكل مرة بنضيف معاه 1/3 كمية اللبن ونضرب بالمضرب لحد ما يندمج نضيف الـ 1/3 الباقي وهكذا لحد ما نخلص الدقيق واللبن ونديهم ضربة اخيرة لمدة دقيقة تقريبا علشان نتأكد ان المكونات اتجانست تماما
بندهن صينية مناسبة بالزيت او الزبدة ونرش عليها دقيق ونعفرها كويس اوي ونصب فيها خليط الكيك وندخلها الفرن على الشبكة اول رف ونسيبها نص ساعة ونفتح نبص عليها هي تقريبا بتاخد من 40 الى 50 دقيقة 
- لو لقيناها احمرت ولسه نية من القلب بتدهني اي غطا حلة مناسب عندك بالزيت وتحطيه على الوش وتسيبيها 10 دقايق هتلاقيها استوت ولو معندكيش غطا ينفع يدخل الفرن ممكن تدهني ورقة فويل زيت وتحطيها 
- لو معندكيش قالب مفتوح ممكن تستخدمي قالب عادي مقاس 26 او 28 
- بعد ما تستوي بتطلعيها وبعد ما تهدا تقلبيها على شبكة وتسيبيها تبرد تماما وتقدميها بالهنا والشفا :)

تكات واسرار نجاح اى كيك : 
- بعد نصف ساعة بتختبرى نضج الكيك بخلة اسنان من المنتصف لو كانت عليت واخدت لون حلو ولسه ما استوتش غطيها بورقة فويل مدهونة زيت او غطا مدهون زيت وسيبيها ربع ساعة كمان هتلاقيها استوت
- بتعايرى المقادير بمج النسكافية او الشاى الزجاج 
- يمكن استبدال كوب الزيت بكوب نصف زيت ونصف زبدة لطعم اغنى
- يمكن استبدال كوب اللبن بكوب كريمة لبانى لقوام اطرى
- قبل ما ندخل الكيك نتأكد ان رف الفرن مظبوط مش مائل والحرارة مش اعلى فى ناحية من الفرن عن الناحية التانية علشان ما يطلعش جزء مرتفع عن جزء
- نتأكد ان الفرن سخن مش بارد علشان الكيك ما تهبطش والافضل نشغله قبل ما نبدأ نشتغل فى الكيك
- ما نفتحش الفرن قبل مرور 25 دقيقة على الاقل علشان الكيك ما تهبطش
- بنخبز الكيك فى صينية فاتحة علشان ما بتوصلش الحرارة بسرعة بس لو مفيش غير صينية غامقة يبقى بنضع تحتها صينية فاتحة
- ما نكترش البيكنج باودر علشان الكيك ما ترتفعش من المنتصف وتهبط من الاجناب
- ما نكترش السوائل علشان الكيك ما تطلعش مكتومة 
- ما نكترش الدقيق علشان سطح الكيك ما يشققش
- الفانيليا السائلة افضل من البودرة لكن لو مش موجودة مفيش مشكلة بنستخدم البودرة 
- كل المقادير تبقى بدرجة حرارة الغرفة يعنى نطلع كل المقادير من الثلاجة قبل ما نبدأ شغل بساعتين 
- ننخل الدقيق اكتر من مرة ونخلطة بالبيكنج باودر والملح والكاكاو علشان نضمن ان الكيك تطلع منفوشة وعالية 
- الكيك شيف نتيجته اجمل من البيكنج باودر لكن لو مش موجود مفيش مشكلة ممكن نستخدم البيكنج باودر عادى
- نقطتين خل بتضيع اى زفارة للبيض فى الكيك ومش بتبان خالص فى الطعم
- البيض الاحمر رائحتة وطعمه افضل من الابيض
- لو هنستخدم البيض البلدي الصغير بنزود بيضة رابعة على المقادير


















اسباب فشل الكيك, الكيك نية من النصف, علاج الكيك الفاشل, الكيك مشقق, الكيك معجن, الكيك هبط, الكيكة هبطت من النص, الكيكة وشها مشقق, الكيكة العادية سالي فؤاد, كيكة الفانيليا سالي فؤاد, كيك للتورتة, التورتة سطحها مشقق, الكيكة الاسفنجية هبطت بعد مابردت, كيكة الشيكولاتة, كيك بالكاكاو,

تعليقات